بين الساقط...واللاقط

من خلال قرائتي لمدونة العزيز بالكويتي الفصيح وموضوعه الاخير جابل طايح الحظktv ابي اكتب عن مسلسلات رمضان ومواقف حصلت معاي شخصياً بسببها الي ما يخلوا من اظهار امور شنيعه بمجتمعنا الكويتي وبطل هالسوالف المسيئه لنا طبعاً ككويتيين فجر السعيد ونايف الراشد وبفصل كل قصه على حده :


القصه الاولى : وقفني شخص سعودي على شارع الخليج بالقرب من ماكدولندز البحر وانا وقف على اساس انه من الممكن يكون مضيع او يبي مكان معين ودار هذا الحديث

السعودي:وين البنات الي مفاصيخ الي تتكلم عنهم مسلسلاتكم الكويتيه انا صراحه جاي من الدمام عشانهم.

انا :اي بنات تتكلم عنهم مفاصيخ شقالو لك تمشي انت بتايلند ولا الكويت ؟

السعودي : والله ياخوي انا قالو لي خوياني(خوياني يعني ربعي) انه بالكويت مليانه كذا بنات .

انا :اقول توكل وبنات مفاصيخ وخرابيط ما عندنا عيب هالسوالف ترضى انا ايي السعوديه واقول هالكلام؟

السعودي :لا حنا ما عندنا بنات مفاصيخ لو عندنا ما جيتكم.

انا :اقول توكل وبلا خرابيط استح على ويهك عيب الشرهه علي انا الي واقف لك.

وحركت وانا ادعي على المسلسلات الي كتبت عن بنات الكويت واصبحت اصابه مباشره لشرف بناتنا.


القصه الثانيه: كنت مع مجموعه من الشباب بالكوت ولا نشوف شباب سعوديين حاكرين بنتين سفور ولبسهم عفيف صراحه يعني مو لابسين شي فاضح او شي من هالقبيل وخرنا البنات عنهم واهم يبجون طبعاً وقعدتهم بسيارتي الى ان يوصل اخوهم ياخذهم من المجمع

رحت تكلمت معاهم قلت لهم مو عيب جذي يا شباب تتحرشون ببنات خلق الله ترضونها بأهلكم ؟

واحد منهم:ياخوي لا تلومنا ترا بعدين هذول بنات شوارع ماهن محجبات(ماهن يعني مو محجبات)

قلت له ومنو قالك كل مو متحجبه بنت شوارع ؟

سكت مع مجموعته وما عرف يرد الشخص هذا وسألته انت من وين قالي من قطر

قلت له لا اشوفك تتحرش ببنات خلق الله مره ثانيه لا تشوف شي ما يسرك صدقني يالله انقلع كمل فرارتك بإحترام .

القصه الثالثه:كنت بمكه وتحديدا قبل الحج بأسبوعين نحضر سكن الحجاج بحملة خالي وننظم الاثاث اليديد مال السكن

وبسكن الاداريين الي انا واحد منهم دار كلام بيني وبين واحد من السعوديين واحنا نتابع قناة بلا اسلوب(سكوب)

قال شنو هالبنات عندكم كل هذول بنات رايحين فيها ؟؟

قلت له للاسف هذا اعلام يشوه سمعتنا وبناتنا اشرف من جذي بوايد وهذا الي يتكلمون عنه امر شاذ عندنا ويظهرون القله القليله

والي اغلبها مو كويتيين وبعدها تصير على وصمة عار على شرف بنات الكويت العفيفات الطاهرات .

طلع لنا بعدها برنامج بو عيده وتعرفون برنامجه وكثرة الطراره فيه والشكاوي وناس تقول احنا مظلومين واحنا واحنا وفينا وفينا

مسكها حجه علي انه عندنا فقاره وهذا سبب يدعوهم انهم ينحلون عن الاخلاق لاجل حفنه من الدنانير

قلت له في فقاره عندنا مو ما عندنا بس ما عمرهم راحو للحرام لا تحكم على قله قليله وتنسف اخلاق شعب كامل لاجل ناس كل يوم تقول وتكرر كلامها على نفس التلفزوين ونفس القناة وتلقط كل ساقط لاقط .

للاسف حتى المسلسلات الي تطلع فيها حياة الفهد واخر مسلسل الدايه اعتقد اظهرت انه في ناس تولد بالحرام ووحده تغري زوج الثانيه صرنا شعب منحل عن اخلاقه بسبب قصصهم التافهه المفترض برمضان يحطون لنا قصص محترمه مو قصص نشوفها ونفطر بسبتها من اغراءات او سب للي كاتبها ومبارك عليكم الشهر مقدماً.

ومفتون قلبي في هوا الغزلان يا عبيد