القبس...وتعريف الشارع

لا اعلم ماذا دهاهم كتاب القبس يتراشقون في ما بينهم في الاونه الاخيره لكن أ.د.عبدالمحسن المقاطع رد الرد الشافي على بو الناشئين بمقاله بردت جبدي رغم عدم توافقي مع الاول ولا الاخير بس جود انه الزميل شقران يكون قاريها وتبرد جبده لانه شايل على هبل وايد.



المهم مو هذا موضوعي



الا صج نواب التيار الاسلامي وتيار الفتاوي او ما اسميهم نواب التخلف يوميا يتناجرون يبون يأجلون الدراسه ويبون يسوون هوليله حوالين انفلونزا الخنازير وكل واحد متشديق ومتمغط ومتكوكس لي بصريح وتهديد ووعيد وناس ساكته وناس ما تبين الا بأروقة الوزاراة ومستعده لتقبيل الايادي لتمشية المعاملات المهم كان من باب اولى يكون صراخهم لتوعية الناس بالصلاة بعيدا عن المسجد الكبير والمساجد المكتظه بالمصلين لتجنب الانفولنزا.



هم مو هذا موضوعي :



موضوعي يا جماعه مجرد اقتراح اقترحته على العزيز عثماني بيني وبينه بالايميل من فتره يعني نقول قبل رمضان بشهر جذي بس ما حبيت انه يشوف النور الا لما ادرسه دراسه لاقترحه عليكم وتبدون رايكم فيه واذا تشجعتوا فيه نطبقه على ارض الواقع بمساعدة بعضنا بعض...



الاقتراح وما فيه انه نطبع كتاب يضم مجموعه من البوستات الي يكتبونها المدونين ويوزع بالمجان مثل الي توزعه القبس بين فتره وفتره مع جريدتها حتى يوصل لأكبر عدد من الناس خصوصا الي يجهلون عالم التدوين...



ناخذ من كل مدون مثلا بوست او اثنين على حسب الارشيف الي يملكه او ممكن تسلسل لقصه معينه فيكون اكثر من بوست له



ندرج بعض من المواضيع السياسيه الي تتكلم بنوع من المزاح والضحك ندرج اشعار بعض من المدونين الي يكتبونها بمدوناتهم ونستغل المدونين الجدد والناشئين(ليس حسب مفهوم الدعيج طبعا)لننشر ما تخطه اناملهم بتدليك كيبوردات لاب توباتهم



بالنهايه الي ابيه منكم تبدون تفاعلكم مع الموضوع بشكل جدي ونشره بمدوناتكم حتى نحظى بدعم اكبر لتحقيق المسعى الهادف لخدمة المدونين جميعهم وتعريف الكويت بعالم التدوين الخفي عليهم...والله ولي التوفيق