بقولكم سالفه

طبعا بعد انقطاع دام عن مدونتي 4 ايام متواصله وكتابتي في مدونة لنا كلمه الي اشارك فيها موضوع عن الطائفيه وليش تشتعل في اوقات الانتخابات انصحكم طبعا تقرونها لانها من عصارة افكاري يحليل افكاري لوول سالفتنا اليوم عن طلعتنا كبر في تاريخ18-7-2009 وهو تاريخ طلعتنا الي بغينا نموت عشان خبال زايد ولكم السالفه من البدايه:

وصلنا المسنه بالفنطاس الساعه 11 تقريبا بليل وتيمعنا هناك 10 اشخاص مقسمين على طرادين من نفس الحجم تقريبا وكان الهوا سرعته 18 كيلو في الساعه كفيله انها تقلب طراريدنا بمساعدة الموج والبحر الهايج نسبياً وطلعنا لسبب سخييييف جدا عشان صاحبنا قال لا والهمبورغر والحركات يعني تخترب وما نقعد نشويهم هناك لا يبا اي شي؟.

حركنا واحنا نتحاذف بين الموج الي ما نشوفه وسوالف العبط بالطريج لما وصلنا طرادين لي كبر جزيرة المجون الي ما شفته لما الحين على كثر روحاتي ورداتي لها وقعدنا شوي بالحركات الي يايبينها معانا واكلنا لما عاد مع الهواء العليل خدرت قلت اريح شوي بالطراد وانا بالطراد قاعد اتأمل النجوم واقول بيني وبين نفسي النجوم غاز مشتعل من ملايين السنين لما الحين ما طفو سبحان الخالق ومرت طياره عبالي شهب متخطرف فوقي بس جيكت على الليتات الحمر الي تترك مثل عيوني من كثر ما الجو ينوم شوي على شق الزراق قعدوني وقالو يالله نبي نحرك بعد الصلاة لانه الهوا قاعد يزيد ولازم نوصل الديره قبل لا نصير مجموعه من الوفيات .

حركنا ورحنا وردينا نهايتنا نطب كبر خوفا من الموج الي يرتفع طول بعضها عن طراريدنا مرتين فكان القرار في الساعه 7 الصبح بتولي النواخذه القياده والي انا واحد منهم وتوكلنا على الله بين تلاطم الامواج خلال 3 ساعات طريق مخيفه لكن كانت من احلا اللحظات الي عرفت وقتها معنى الخوف الفعلي على من معاك قبل ان تخاف على نفسك وبيني وبينكم لابسين السباحات او اللايف جكت الي تطفح الواحد لانه البحر مافيه مرجله ولا يعرف سباح وغواص الي يعرفه البحر كيفية الالتهام فقط واغراق الناس في غضبه وما يملكون من عده وعديد معهم .

ولما وصلنا لي الفنطاس والله كتب لنا ما كتب وقتها تحمد كل شخص لله شكرا على السلامه بس الي باط جبدي بالسالفه كلها ليش ما رحنا حدقنا شويه مادري بس كانت رحله سعيده وتعور الظهر من كثر المناقز بين الموج وغشمرته البايخه معانا بتحذفه لنا من صوب لي صوب وخلى لنا طريجنا من ساعه لي ثلاث ساعات متعبه بالبحر ولما حطيت راسي ونمت حسيت انه انا لما الحين بالطراد اتطوطح مع الموج.

العبره من القصه شنو ما ادري بس لا تطلعون بحر الا لما تتأكدون من الجو 100% ولا ترا بيصير فيكم الي صار فينا اي يا ظهري,,,