صدفه يا حلوها من صدفه

هالبوست كنت بكتبه امس بس لأني راد البيت متليش بعد التفاهم مع قنجة مجبوس لحم تالي الليل بس قبل المجبوس الهرفي الطيب كنت قاعد اعسعس بالدسمه مع واحد من الربع وبالصدفه لقيت حبيب قلبي الثاني مو الاول علي الراشد لا الثاني الي اهو يكون يا طويلين العمر

سيد يوسف الزلزله مطبل للحكومه رقم واحد

عاد قلت بما اني ما ادور السوالف خل اسأله عن سالفة الاحاله بشوفه شنو يقول؟؟؟؟

انا: سيد يوسف سيد يوسف لو سمحت ممكن كلمه بس

اهو: مشغول (ويبي ينحاش)

انا : دقيقه بس لو سمحت

اهو :تفضل تراني مستعجل

انا : ليش ما لقينا ولا تصريح لك عن عدم الاحاله للنيابه من قبل وزير الداخليه ؟؟؟ وليش بلقاء الراي ما تكلمت فيها؟؟؟ وليش ما بريت بقسمك بشأن حماية الاموال العامه؟؟؟

اهو: أأأأأأأأأأأ والله شوف يعني عدم الاحاله لم يتم ثبوتها حتى الآن فبالاونة الاخيره كثر اللغو واللغط ومن واجبنا انه نكون حريصين على المال العام لكن الاحاله هي يمكن وكيل النيابه بينه وبين الوزير عداوه شخصيه وانا اجزم بهذا الشيء بس يعني بإعتقادك مو من باب اولى انه يوزعون عيش كونتري بالتموين افضل؟؟؟

انا: شكو شكو شكو انزين وليش ما بريت بقسمك على تبديد الاموال 5 مليون ميزانية مملكة بوتان بكبرها ليش مو تارسه عينك؟؟؟

اهو: ها مشغول قلت لك مشغول باي باي انت شكلك من المؤزمين

انا: !!!! حياك الله

ملاحظه:هذا البوست من وحي الخيال بس شفته امس صج وناديته ما رد علي....البوست الياي لو اصادف سلوى الجسار الي بيخسرها المجلس زين على زين بس وين احصلها تهقون ؟؟؟

وهذا اهداء عشان الصدفه الجميييله اوي اوي